獨在異鄉為異客
喺太平洋嘅另一邊，我搵到我嘅家
哥斯達黎加並不是波多黎各。
我喺哥斯達黎加遇見嘅第一個人提我千祈唔好撈亂呢兩個地方。雖然兩地人民都熱愛 reggaeton 音樂, 前者係一個位處中美洲嘅主權國，後者係一個隸屬美國嘅自治邦，至今仍然未走出天災人禍嘅陰霾：2017年，颶風艾瑪同埋瑪利亞侵襲，造成超過三千人死亡；2019年爆出嘅Telegram門 （Telegramgate） 引起大規模示威，最終逼使時任總督下台。
哥斯達黎加並不是拉斯維加斯。
對唔住呀媽，但係哥斯達黎加真係唔係喺沙漠入面㗎。雖然佢俾國家地理雜誌選為
全世界其中一個最快樂嘅國家，但係佢哋快樂嘅源頭絕對唔係黃賭毒，反而係 Pura Vida （直譯為純生活嘅一種生活態度）、壯麗奇觀、同埋首屈一指嘅生物多樣性。
哥斯達黎加並不是香港，亦不是美國。
當我孓然一身喺太平洋嘅另一邊做六個禮拜義工，用我非常有限嘅西班牙話為氣候行動出一分力嘅時候，我實在估唔到，我竟然搵到屬於我嘅家。
話說，時間啱啱好。
我喺美國讀書；五月三號嘅時候，我返到嚟香港，我出世同埋成長嘅地方，放大學嘅第一個暑假。 本身我計劃好六月中出發前往哥斯達黎加， 但係因為服務單位臨時進行修葺工程， 要將行程押後三個禮拜。最後我喺七月六號出發，義工服務一完就即刻搭飛機去亞特蘭大開始第二個學年。
當我返到香港嘅時候，我感覺有啲不安。我非常之喜歡呢個城市，咁繁華，乜嘢都係世界級， ，仲有入面嘅香港人。我哋嘅香港人。然而，由我屋企望出去（我哋無錢，要租樓架），濃密嘅烏雲總係籠罩著香港。係香港生活嘅壓力之大唔使多講，冇得買樓，無得放工，仲要無得向上流動。再者，我哋嘅政治前景一日不如一日。可能係因為咁，所以當我有幸能夠攞到兩個獎學金去留學嘅時候，我真係好開心；可能喺地球嘅另一面，啲草會綠啲，天空藍啲，我嘅前途喺世界級教育嘅加持之下會光明一啲。過多幾年，仲可以攞埋工作簽證，抽到綠卡就更好。
下次返到嚟嘅時候，香港又會變成點呢？
但係當香港政府決定強推《逃犯條例》嘅時候，形勢立即一發不可收拾：好多人擔心條例會將 分隔香港同埋內地司法制度所僅餘嘅防火牆一一摧毀。人民憤怒了！ 接近二百萬人上街遊行示威，接著出現嘅抗爭行動，越見激烈，越見創意。
因為我改咗班機，所以可以陪同家中兩老出席多場示威。不過，中途落車嘅時候又到啦；六個月之內，我唔會返嚟。 我當然祝願香港人要擇善固執，奮鬥到底。但係我可以喺哥斯達黎加生存嗎？我會變嗎？下次返到嚟嘅時候，香港又會變成點呢？
兩班機，一場大風暴，二十六個鐘頭之後，我帶著疲憊不堪嘅身軀到達胡安 • 聖瑪麗亞國際機場 （Aeropuerto Internacional Juan Santamaría）。
哥斯達黎加果然唔係香港。同大部分地方一樣，交通經常出現問題，係呢個時候你就會醒起， 全國家最寬闊嘅洲際公路都只係每邊有兩條行車線咋。 冷氣呢樣嘢，喺大部分屋企都唔存在。 哥斯達黎加面積係香港嘅五十倍，人口就只有香港嘅三分之二。
然而，當細心留意嘅話，哥斯達黎加喺骨子裏同香港嘅某啲地方上有啲相似。大部分係公路驅馳嘅汽車都係現代，富士，豐田等等大家熟悉嘅亞洲品牌。香港製造嘅李錦記蠔油 — 當地人Ticos 稱呼佢做「Chinese Sauce」—會出現喺飯檯上。有啲廣東人會開士多同埋餐館，我可以隨意同佢哋用廣東話吹水。
但係當我到達 EcoTarcoles， 呢六個禮拜我進行義工服務嘅單位同埋我留宿嘅地方，嘩我真係嚇親。 我嘅第一個印象就係呢個地方好牙煙，隨時會冧。間屋仔無任何玻璃窗，只係靠牆上嘅中空磚令到空氣勉強流通。日光日白留係室內簡直好似浸桑拿。出面嘅洗手盆係爛嘅；洗手嘅時候啲水會流晒落對腳到。 落雨嘅時候（即係每一日），屋頂彌漫住一大陣火水味。呢一棟海景樓係會入沙嘅，啲沙沿著屋頂嘅狹縫同埋牆身嘅裂痕入晒嚟，成地都係薄薄一層沙。
仲有仲有好多蛇蟲鼠蟻。去到嘅第一日我或者唔記得拉蚊帳，結果被各類昆蟲咬咗超過一百下，腳踭腫到連行路都覺得痛。講真，我真係頂唔順勁多螞蟻圍著廚房洗手盤同埋廚餘桶氹氹轉。
同大部分地方一樣，交通經常出現問題，係呢個時候你就會醒起， 全國家最寬闊嘅洲際公路都只係每邊有兩條行車線咋。
有幾次我真係問自己究竟我係咪能夠繼續落去：我嘅體能走晒樣，進行基本嘅體力勞動已經喘晒氣。 即使係咁樣，我決定一啲都唔會退縮：係我自己揀嚟呢度認識下自己究竟有幾能屈能伸；我係一個擇善固執嘅人。更甚者，仲有一陣民族自豪感煽風點火：之前有兩個香港義工令到負責人留低非常差嘅印象；佢哋本身諗住永不錄取香港嘅義工，只係因為佢哋見到我喺美國接受教育，所以決定破例一次。
我唔係會丟香港人架丫嘛？
香港係咪中國呢？
呢個問題嘅答案真係要精雕細磨，政治正確。
而我呢，我會首先講解「 一國兩制」 嘅歷史背景同埋原意。然後呢，我會表示對中國人嘅尊重。唔係講笑，我認識嘅大部份中國人真係都係良善，聰明嘅。筆鋒一轉，我會話畀佢哋知，香港係可以用 Facebook、Twitter、Google、Youtube，同埋 Netflix㗎。香港有宗教、言論、新聞自由，堅守司法獨立（最少大部分時間啦，你懂的）仲有部份— 仲未係全部 — 民選出嚟嘅議員。
中國大陸無呢啲嘢。 一啲都無。學資深記者區家麟話齋，香港係「中國最後的自由堡壘」。
最後我一定會強調嘅尊重內地人，而且同情佢哋嘅無知，慨嘆佢哋處處被箝制。我覺得我好似林肯總統所講，一個一邊驅趕纏繞嘅蜜蜂，一邊傳緊福音嘅牧師。
自由好脆弱，一個唔留神，侵略者一出手，我哋所一直擁有嘅就會蕩然無存。
同我對話嘅每一個人，心入邊嘅疑惑變成震驚，憤怒，再變成懊惱。哥斯達黎加係中美洲第一個因為「經濟原因」同台灣斷交再同中國建交嘅國家。中國即刻送咗個價值一億嘅國家大球場比佢哋。Ticos 食嘅用嘅好多都係 hecho en China （中國製造），安全風險同埋侵權問題就街知巷聞啦；我又估唔到華為手機面臨來自美國嘅間諜行為指控同埋禁售，竟然係呢度賣到成巷成市。
而家望返轉頭，呢個就係點解哥斯達黎加有似曾相識嘅感覺。佢同香港一樣， 都係局勢不穩嘅地區入面，象徵繁榮、穩定、自由嘅一小片綠洲。佢同香港一樣，最叻越級挑戰，但係外人對佢仍然有好多誤解。
佢同香港一樣，越嚟越受到中國「無形之手」嘅干預。
有一次，我被邀請參加 Global Village；係呢個活動入面， 我同埋喺哥斯達黎加各地嘅義工會各自向公眾分享自己嘅文化。基於我嘅雙重身份，主辦人提議我不如代表美國啦。
我話，我堅決要代表香港，因為佢係我嘅家。我得到佢嘅全力支持。
幾日之後，我喺主要城市卡塔戈嘅一個商場入面向路人介紹我嘅家。我投影片嘅西班牙文標題係:
Hong Kong no es China.
你可以話我事後孔明，但係我當時應該搵一個更加準確嘅主題：
香港不是中國。
暫時未係。
當其中一個項目負責人 Fernando 繼承呢間屋嘅時候，佢已經被丟空咗超過十五年。
佢都算係喺呢間屋度成長嘅，話晒呢度以前都係佢阿爺阿嫲嘅渡假屋。當佢同女朋友，亦都係項目負責人嘅 Raquel 終於返到嚟將呢間屋，開始重新打造成佢哋嘅基地嘅時候，佢哋總共用咗足足兩個禮拜執屋。我諗當佢成年之後第一次行入間屋，情況一定觸目驚心。 Rio Grande de Tárcoles （塔爾科萊斯河） 喺距離呢度唔係好遠嘅地方匯入太平洋；呢條河係全個中美洲最受污染嘅。 啲沙灘成地垃圾，遠至太平洋嘅另外一邊都有（我曾經執到一個膠樽，包裝寫滿晒簡體中文）。呢個絕對唔係一棟理想嘅海景樓。
然而，Fernando 當然有備而嚟啦。佢事先用咗兩年度橋，究竟要做啲乜、點解要做、同埋點樣做，都有非常之清晰嘅願景。喺義工嘅幫助之下, 佢哋起咗用竹做嘅環保浴室、旱廁。佢哋由得土雞、孔雀周街走，並且享受非常好食嘅雞蛋（佢哋食素架）。 一行又一行新種嘅 alemandro 樹整齊地列喺岸邊，樹上面嘅杏仁果吸引艷麗嘅五彩金剛鸚鵡（scarlet macaw）棲息覓食。
如是者，當我嚟到嘅時候， 情況開始出現轉機。
我真係好佩服兩位負責人嘅堅持：自從佢哋開始咗呢個項目，佢哋已經甚少離開哥斯達黎加。 我漸漸以洗碗碟、餵雞、掃地、煮嘢食等嘅家務為傲。螞蟻之所以比之前少咗，純粹係因為我係佢哋發現食物之前已經將佢哋清理妥當。 係呢六個禮拜裡面，呢間屋成為我嘅家；而我哋又令到我哋呢間屋 ，我哋嘅家，每一日變得更加美麗、舒適、環保。「斯是陋室，惟吾德馨」，此言得之。
我真係有啲後悔初來報到就咁快對呢個地方落定論。我之後先知道 Fernando 原來曾經申請重建呢間屋，但係因為一條保育生態、限制海岸發展嘅法例而被當局拒絕。縱使佢哋面對住一個爛攤子，因為佢哋單純地愛呢個家，所以能夠成功力挽狂瀾，轉危為機。去到呢一日，市政府甚至表揚佢哋為當地環保運動嘅生力軍。
我同自己許下承諾，無論屋企發生乜嘢事都好，我一定會盡我所能令到佢變得更好。少少苦楚，咪就係等於激勵？
我哋養咗一隻雞仔，去到邊都會喺度雞叫；Fernando 形容呢隻雞仔簡直係一部噪音機器。
有一日 Fernando 教緊我點樣用佢哋部洗衣機嘅時候，雞叫聲突然間冇咗。Fernando意識到情況有古怪，就即刻衝咗去屋企隔離嘅一片空地，從一隻麻鷹嘅爪之中救返隻雞仔出嚟。好彩佢警覺性咁高，唔係嘅話，麻鷹捉雞仔嘅情況就會喺現實中上演。
自由好脆弱。 一個唔留神，侵略者一出手，我哋所一直擁有嘅就會蕩然無存。
搞咗好耐，我終於成功打開通往海灘嘅大閘。
我小心翼翼地沿著一條同海岸線並排嘅小徑，避開晒地下嘅垃圾再轉左，撥開生到膝頭咁高嘅雜草，去到黑沙灘。
傍晚六點嘅漲潮好似一面薄鏡咁樣反射夕陽餘暉，慢慢咁燃燒成個海灘， 冷酷嘅灰銀變成柔和嘅粉紫，再成為熾熱嘅朱紅，真係非常壯觀。
眼前良辰美景最容易令人胡思亂想，我就偏偏諗起哥斯達黎加足球國家隊。 嗱，中國就出晒錢出晒力啦，連國家大球場都幫人起埋；果然，哥斯達黎加喺世界盃越戰越強，2014巴西個屆仲入埋八強添。奇怪就在於強國咁耐以嚟淨係入過一次世界盃咁大把，仲要從未破蛋；堂堂大國竟然搵唔到十一個人踢贏人口五百萬嘅中美洲小國？真係震驚十三億人！
哥斯達黎加喺足球同埋其他領域已經搵到自己嘅方向，喺香港能夠亮相世界舞台之前，哥斯達黎加就暫時成為我嘅主隊。如果Ticos做得到，我哋一定可以。
[哥斯達黎加]同香港一樣， 都係局勢不穩嘅地區入面，象徵繁榮、穩定、自由嘅一小片綠洲。佢同香港一樣，最叻越級挑戰，但係外人對佢仍然有好多誤解。
我又會思鄉。
家，係每晚疲勞嘅身心靈入睡之前，你諗起嘅地方。家，係你伸手不見五指、迷失嘅時候所指路嘅明燈（我喺Manuel Antonio National Park嘅時候，一個巨浪湧埋嚟，沖走咗我副眼鏡；回程嘅時候，因為溝通問題，巴士司機竟然將我掉低喺荒山野嶺）。無論你嘅家有幾好（或者差都好），你都一定會守護佢，為佢付出。你可能有好多個歸宿，但喺家只有一個。
Fernando同埋Raquel之前喺屋企外面嘅帳篷安裝咗一排燈膽。既然最微弱嘅光都能夠驅走黑暗，何況係屹立喺高樓大廈之間嘅霓虹，又或人心入面嗰團火？
最近我同朋友都有討論前景嘅問題。當然我哋有講笑嘅成分啦，連學位都未攞到，有乜嘢本錢搞移民呢？但喺諗深一層，如果你嘅家再唔能夠住人嘅話，究竟點算呢？我哋好幸福，能夠接受世界級嘅教育，咁冇我哋咁幸運嘅人到時又會有乜嘢下場呢？究竟我哋能唔能夠搵到新嘅家呢？
呢啲問題，尚待下回分解。而家，我哋有更重要嘅嘢需要去做。
隨著陽光漸漸褪色，我堅信喺太平洋嘅另一邊，太陽又會冉冉升起，光照大地。幾千萬年嚟如是，將來亦繼續會喺咁。每一日都會為更美好嘅未來、更美好嘅家帶嚟希望。但喺我哋唔可以懼怕晨曦前嘅黑暗；我哋要擇善固執，堅持到底。
香港人，加油。
